Soliq sohasiga oid ma'lumotlar lug'ati

DSQ - Davlat soliq qo‘mitasi

DSB - Davlat soliq boshqarmasi

DSI - Davlat soliq inspeksiyasi

YSTHDSI - Yirik soliq to‘lovchilar bo‘yicha hududlararo davlat soliq inspeksiyasi

Soliq auditi - bu yuqori darajada riskka tushgan soliq to‘lovchi tomonidan soliq qonunlariga rioya etilishini har tomonlama o‘rganish hisoblanib, soliqlarni to‘lashdan bo‘yin tovlash xavfi omillarini tahlil qilish asosida tanlangan soliq to‘lovchilarga nisbatan o‘tkaziladi. Tanlab olingan soliq to‘lovchilarda soliq auditi barcha soliq va yig‘imlar bo‘yicha, shuningdek bitta yoki bir nechta soliqlar bo‘yicha o‘tkazilishi mumkin. Soliq to‘lovchining muayyan davr uchun soliqlar va yig‘imlarning hisoblanishi hamda to‘lanishining to‘g‘riligini tekshirish maqsadida, uning buxgalteriya, moliya, statistika, bank hamda boshqa hujjatlari o‘rganiladi va taqqoslanadi.

Sayyor soliq tekshiruvi - soliq to‘lovchilarning soliqlar va yig‘imlarni hisoblab chiqarish hamda to‘lash sohasidagi ayrim majburiyatlarini, shuningdek, soliq to‘g‘risidagi qonun hujjatlarida belgilangan boshqa majburiyatlarini bajarilishini tekshiradi. Soliq organlari sayyor soliq tekshiruvi doirasida soliq solish obyektlarini aniqlash, xronometraj kuzatuvlarini o‘tkazish, nazorat-kassa texnikasi va hisob-kitob terminallari qo‘llanilishini tekshirish, soliq to‘lovchi xodimlarning hisobotdagi va haqiqiy soni muvofiqligi yuzasidan monitoring ishlarini amalga oshiradi.

Kameral soliq tekshiruvi - soliq to‘lovchi tomonidan taqdim etilgan soliq hisobotlarini va soliq to‘lovchining faoliyati to‘g‘risida soliq organida mavjud boshqa maʼlumotlarni o‘rganish va tahlil qilish yo‘li bilan soliq organi tomonidan o‘tkaziladigan tekshiruvidir. Kameral soliq tekshiruvi O‘zbekiston Respublikasi Soliq kodeksining 88-moddasida belgilangan daʼvo muddati o‘tmagan soliq davrlariga nisbatan o‘tkazilishi mumkin. Kameral soliq tekshiruvi soliq organi joylashgan joyda amalga oshiriladi, bundan soliq to‘lovchining hudud va binolarini ko‘zdan kechirish bilan bog‘liq holatlar mustasno. Hududlarda o‘tkazilayotgan tekshiruvlar soliq to‘lovchi tomonidan taqdim etilgan soliq hisobotlarida ko‘rsatilgan ko‘rsatkichlar va maʼlumotlar hamda soliq to‘lovchining faoliyati to‘g‘risida soliq organida mavjud boshqa maʼlumotlarning haqqoniyligini tasdiqlash uchun o‘tkaziladi. Tekshiruvlar soliq to‘lovchilarda belgilangan ish rejimiga asosan o‘tkaziladi va «Tekshiruvlarni ro‘yxatga olish kitobi» to‘ldirilganidan so‘ng amalga oshiriladi. Ushbu tadbir davomida hujjatlar va buyumlarni olib qo‘yishga yo‘l qo‘yilmaydi.